Missina, Biniditta e Beddha!
O terra di Cariddhi, ammaliatura,
stu mari cilistinu è ‘a to’ cintura.
Li coddhi to’ sù ghirlanna ‘i ciuri
e ‘i figghi to’ sù chini ‘i tantu amuri.
O terra diamantata di Missina,
tu, di li gran cittati, sì a riggina.
Stu mari, a ninna-nanna, quannu è sira,
ti canta, comu ‘a ‘nu Bamminu ‘i cira.
Quannu spampina ‘i ciuri ‘u gersuminu,
pi l’aria è ‘nu profumu accussì finu,
e ‘i furisteri tutti fa’ ‘ncantari
vinuti di luntanu pi vardari
li to’ biddizzi priziusi e rari
chi ‘nto munnu di tia fannu parrari.
Ricamunu, cantannu, l’usignoli
facennu ‘ntra marina beddhi voli.
O terra di pueti e cantarini,
‘unni la zagra di li mannarini
‘unni li versi assemi a li canzuni
un paradisu fannu d’ogni agnuni.
Tu sì un giardinu chinu d’ogni ciuri,
‘unni ogni cori canta a lu so’ amuri.
Tu sì la terra di me’ mammiceddha,
perciò sì biniditta e la chiù beddha.